Joh 6 | BOJ | STEP | Bati bei Yesus a Galili ya agu taqal beiq gilej. Ya agu di aqa ñam bei Taiberias ya agu.

John 6

Yesus a na tamo 5,000 naŋgi iŋgi anainjrej

1 Bati bei Yesus a Galili ya agu taqal beiq gilej. Ya agu di aqa ñam bei Taiberias ya agu. 2 Nami Yesus a Qotei aqa maŋwa gargekoba babteqnaqa tamo uŋgasari tulaŋ gargekoba naŋgi unoqneb. Agi a na tamo ma ti soqneb qaji naŋgi boletnjreqnaqa tamo uŋgasari naŋgi unoqneb. Deqa Yesus a ya agu taqal beiq gileqnaqa naŋgi a dauryosib giloqneb. 3 Onaqa bati di Yesus a na aqa aŋgro naŋgi joqsiqa koba na manaq oqsibqa mana goge dia awesoqneb. 4 Bati deqa Juda naŋgo yori bati koba bei jojomej. Qotei a nami Israel naŋgi Isip sawaq dia padalqa laqnabqa eleŋosiq aqaryainjrej deqa are qalqajqa bati jojomej. 5 Onaqa Yesus a ŋam atsiqa tamo uŋgasari tulaŋ gargekoba a dauryosib aqa areq beqnabqa unjrsiqa aqa aŋgro bei Filip nenemyej, “Iga qabe na iŋgi awaiyosim tamo uŋgasari kalil di anainjronam kereqas?” 6 Filip aqa areqalo kie Yesus kamba minjim a quqwajqa deqa laŋa nenemyej. Kumbra kie a segi yqajqa di a nami qalieej.

7 Onaqa Filip na kamba Yesus minjej, “Iga 200 kina osim dena iŋgi awaiyosim iŋgi kiñala kiñala anainjrqom di kereqasai.” 8 Ariya Saimon Pita aqa was Andru di Yesus aqa aŋgro bei a na Yesus minjej, 9 “Aŋgro wala bei unu. A bem 5-pela qe kiñilala aiyel ojejunu. Di dego tamo uŋgasari gargekoba endi anainjrqom di tulaŋ kereqasai.” 10 Onaqa Yesus na aqa aŋgro naŋgi minjrej, “Niŋgi na tamo uŋgasari minjribqa kalil mandamq di awoeleŋebe.” Sawa dia ñiŋ koba soqnej. Deqa Yesus aqa aŋgro naŋgi na tamo uŋgasari minjrnabqa kalil ñiŋq di awoeleŋeb. Tamo awoeleŋeb qaji sisiyeb 5,000.

11 Awoonabqa Yesus na bem ti qe ti di osiqa Qotei pailyosiqa tamo uŋgasari awoeleŋeb qaji naŋgi jeisi anainjreqnaq uyoqneb. Uynab kalil menetnjrej. 12 Naŋgi menetnjrnaqa Yesus na aqa aŋgro naŋgi minjrej, “Niŋgi iŋgi oto kalil koroiyiye. Oto bei urataib.” 13 Degsi minjrnaqa naŋgi bem 5-pela aqa oto kalil tamo uŋgasari naŋgi urateleŋeb qaji di koroiyosib gumba kokba 12-pelaq di jignab maqeleŋej.

14 Tamo uŋgasari kalil naŋgi Yesus aqa maŋwa di unsib deqa maroqneb, “Bole, Qotei aqa medabu o tamo nami Qotei na qariŋyim bqajqa marej qaji agi a di.” 15 Onaqa Yesus a naŋgo anjam di qusiqa endegsi qalieej, tamo uŋgasari kalil naŋgi bosib a ojsib a naŋgo Mandor Koba sqajqa minjqab. Yesus a degsi qalieosiqa naŋgi a mandor koba ataib deqa a sawa di uratosiqa a segi manaq oqsiq di soqnej.

Yesus a ya baŋgaq na walwelej

16 Ariya bilaqtonaqa Yesus aqa aŋgro naŋgi alile aieb. 17 Aisib qobuŋ bei gogetosib qobuŋ suweiyosib gileb. Naŋgi mareb, “Iga ya agu taqal beiq gilsim Kaperneam qureq di tiryqom.” Naŋgi degsib marsib gileb. Qoloonaqa Yesus a naŋgoq bosaisoqnej. 18 Naŋgi ya agu ambleq di gileqnabqa jagwa koba tigelosiqa ya korkortosiqa naŋgi pulutnjrej. 19 Naŋgi 5-pela o 6-pela kilomita oyoosib gileqnabqa Yesus a ya baŋgaq na walwelosiqa naŋgi daurnjrsiq gilej. Gilsiq qobuŋ jojomyonaqa ŋam ateb a ya baŋgaq na walwelosiq beqnaqa unsib ulakobaeb. 20 Deqa Yesus na minjrej, “Endi e beqnum. Ulaaib.” 21 Degsi minjrnaqa naŋgi areboleboleinjrnaqa a metonab qobuŋ gogetej. Onaqa qobuŋ a ururosiq sawa naŋgi gilqajqa gilteb qaji di tiryej.

Tamo uŋgasari naŋgi Yesus qa ŋamoqneb

22 Nebeonaqa tamo uŋgasari qudei naŋgi ya agu taqal beiq di soqneb. Naŋgi qalie, ya bilaq qobuŋ qujai segi dia tiryosiq soqnej. Qobuŋ bei dia sosai. Yesus aqa aŋgro naŋgi segi qobuŋ di gogetosib gileb. Yesus a naŋgi koba na qobuŋ di gogetosai. 23 Ariya qobuŋ qudei Taiberias qure uratosib bosib sawa Tamo Koba Yesus a nami Qotei pailyosiq tamo uŋgasari naŋgi iŋgi anainjrnaq uyeb qaji sawa di jojom di tiryeb. 24 Onaqa tamo uŋgasari naŋgi uneb, Yesus a di sosai. Aqa aŋgro naŋgi dego di sosai. Deqa naŋgi qobuŋ di gogeteleŋosib gilsib Kaperneam qureq dia Yesus qa ŋamoqneb.

Yesus a segi ŋambile qa iŋgi uyo bole

25 Osib naŋgi ya agu taqal beiq dia Yesus itosib nenemyeb, “O Qalie Tamo Koba, ni bati gembu endeq bem?” 26 Onaqa Yesus na kamba minjrej, “Niŋgi quiye. E bole merŋgwai. Niŋgi ijo siŋgila unsib e qa poiŋgwo deqa niŋgi e qa ŋamosai. E niŋgi bem anaiŋgonam uynab menetŋgej utru deqa niŋgi e qa ŋamoqnab. 27 Jejamu qa iŋgi a koboqas. Niŋgi iŋgi deqa wauaib. Iŋgi gaigai sqas qaji deqa niŋgi wauoiye. Iŋgi dena niŋgi ŋambile gaigai sqab. Ŋambile gaigai sqajqa iŋgi di e Tamo Aŋgro na niŋgi anaiŋgwai. Ijo Abu Qotei na e giltbej deqa e na iŋgi di anaiŋgwai.”

28 Onaqa naŋgi na kamba Yesus nenemyeb, “Iga wau kie yonamqa Qotei a marqas, ‘Di ijo wau bole agide’?” 29 Onaqa Yesus na kamba minjrej, “Qotei aqa wau agi merŋgwai. Niŋgi tamo Qotei na qariŋyej qaji a qa nuŋgo areqalo siŋgilatiye. Tamo di agi e segi.”

30 Onaqa naŋgi Yesus aqa anjam di qusibqa olo nenemyeb, “Ni Qotei aqa maŋwa kie babtim iga unsim ni qa gago areqalo siŋgilatqom? Nami gago moma naŋgi wadau sawaq di sosib laŋ qure qa bem uyoqneb. Agi Qotei aqa anjam bei nami endegsib neŋgreŋyeb unu, ‘A na laŋ qure qa bem tamo uŋgasari naŋgi anainjreqnaq uyoqneb.’ Degsib neŋgreŋyeb. Ariya ni wau kie yim iga unsim ni qa poigim gago areqalo ni qa siŋgilatqom?” 32 Onaqa Yesus na kamba minjrej, “Niŋgi quiye. E bole merŋgwai. Moses a na laŋ qure qa bem di niŋgi anaiŋgosaioqnej. Ijo Abu a segi na laŋ qure qa bem bole niŋgi anaiŋgeqnu. 33 Bem bole Qotei na niŋgi eŋgeqnu qaji di laŋ qureq dena mandamq aisiq tamo uŋgasari mandamq endi unub qaji naŋgi ŋambile enjreqnu.” 34 Onaqa naŋgi na Yesus minjeb, “O Tamo Koba, bati gaigai iŋgi di anaigoqne.” 35 Onaqa Yesus na minjrej, “E segi ŋambile qa bem bole. Deqa tamo bei a ijoq bqas di a bunu mamyqasai. Tamo bei a e qa aqa areqalo siŋgilatqas di a bunu ya qaryqasai dego.

36 “E niŋgi merŋgonum, niŋgi gaigai nuŋgo ŋamdamu na e nubeqnub. Ariya niŋgi e qa nuŋgo areqalo siŋgilatosaieqnub. 37 Tamo uŋgasari kalil Qotei na e ebej qaji naŋgi ijoq boqnqab. Tamo ijoq bqas qaji di e na olo wiyqa keresai bolesai. 38 E ijo segi areqalo dauryqajqa e deqa laŋ qure uratosim mandamq aiosai. Abu e qariŋbej qaji aqa areqalo dauryqajqa deqa e laŋ qure uratosim mandamq aiem. 39 Abu e qariŋbej qaji aqa areqalo endegsi unu. Tamo uŋgasari kalil a na ebej qaji bei e na uratit padalqasai. E na naŋgi kalil diŋo bati qa olo subq na tigeltnjrqai. 40 Ijo Abu aqa areqalo endegsi unu. Tamo kalil e Qotei aqa Ŋiri nubsib e qa naŋgo areqalo siŋgilatqab qaji naŋgi ŋambile gaigai sqab. Diŋo bati qa e na naŋgi olo subq na tigeltnjrqai.”

41 Onaqa Juda tamo kokba naŋgi Yesus aqa anjam di qusibqa naŋgi a qa ugeosib a qa yomuoqneb. Di kiyaqa? A marej, “E segi bem bole laŋ qure uratosim mandamq aiem qaji.” Deqa naŋgi a qa yomuoqneb. 42 Yomuoqnsib maroqneb, “Tamo di Yesus. A Josep aqa ŋiri. Aqa ai wo abu wo naŋgi qa iga qalie. A kiyaqa marqo, ‘E laŋ qure uratosim mandamq aiem’?”

43 Onaqa Yesus na kamba minjrej, “Niŋgi segi segi anjam koba e qa maroqnaib. 44 Ijo Abu na e qariŋbonaq mandamq aiem. Tamo bei aqa segi areqalo na ijoq bqa keresai. Ijo Abu na are bulyetim ijoq bqas. Yim diŋo bati qa e na olo subq na tigeltqai. 45 Qotei aqa medabu o qaji tamo naŋgi nami anjam endegsib neŋgreŋyeb unu, ‘Qotei a na tamo uŋgasari kalil naŋgi aqa kumbra osornjroqnim naŋgi a qa qalieoqnqab.’ Deqa tamo uŋgasari kalil ijo Abu aqa anjam quoqnsib a qa qalieeqnub qaji naŋgi ijoq beqnub.

46 “Tamo bei a ijo Abu aqa ulatamu unosai bolesai. E segi qujai ijo Abu aqa ulatamu unem. Agi e nami Qotei ombla sosim dena bem. 47 Niŋgi quiye. E bole merŋgwai. Tamo a e qa aqa areqalo siŋgilatqas di a ŋambile gaigai sqas. 48 E segi ŋambile qa bem uyo bole. 49 Nami nuŋgo moma naŋgi wadau sawaq di sosibqa laŋ qure qa bem uyoqneb. Ariya bunuqna naŋgi kalil moreŋekriteb. 50 Ariya e segi qujai bem bole laŋ qure uratosim mandamq aiem qaji. Tamo uŋgasari naŋgi bem di uyqab di naŋgi moreŋqasai. 51 E segi ŋambile qa bem bole laŋ qure uratosim mandamq aiem qaji. Tamo bei a bem di uyqas di a ŋambile gaigai sqas. Bem di agi ijo segi jejamu. E na tamo uŋgasari mandamq endi unub qaji naŋgi ijo segi jejamu naŋgi anainjrit uyqab. Uysib naŋgi ŋambile sqab.”

52 Onaqa Juda naŋgi Yesus aqa anjam di qusib segi segi ŋiriŋosib maroqneb, “Tamo di a kiersimqa aqa segi jejamu iga anaigim uyqom?”

53 Onaqa Yesus na kamba minjrej, “Niŋgi quiye. E bole merŋgwai. E Tamo Aŋgro. Deqa niŋgi ijo jejamu ti ijo leŋ ti uyqasai di niŋgi ŋambile gaigai sqasai. 54 Tamo naŋgi ijo jejamu ti ijo leŋ ti uyqab di naŋgi ŋambile gaigai sqab. Deqa diŋo bati qa e na naŋgi olo subq na tigeltnjrqai. 55 Di kiyaqa? Ijo jejamu di iŋgi uyo bole. Ijo leŋ di ya uyo bole. 56 Tamo naŋgi ijo jejamu ti ijo leŋ ti uyqab di naŋgi e ombla sqab. E naŋgi ombla sqai. 57 Ijo Abu ŋambile unu qaji a na e qariŋbej deqa aqa siŋgila na e segi dego ŋambile unum. Dego kere tamo naŋgi ijo jejamu ti ijo leŋ ti uyqab di naŋgi dego ijo siŋgila na ŋambile sqab. 58 E segi bem bole laŋ qure uratosim mandamq aiem qaji. Nami nuŋgo moma naŋgi laŋ qure qa bem uyoqneb. Ariya bunuqna naŋgi kalil moreŋekriteb. E segi bem uyo bole. Deqa tamo naŋgi bem bole di uyqab di naŋgi moreŋqasai. Naŋgi ŋambile gaigai sqab.” 59 Yesus a Kaperneam qureq Juda naŋgo Qotei tal miligiq dia sosiqa Qotei aqa anjam di palontsiq tamo uŋgasari naŋgi minjroqnej.

Yesus a segi ŋambile gaigai sqajqa anjam utru

60 Onaqa Yesus aqa aŋgro naŋgi aqa anjam di qusibqa naŋgi segi segi gargekoba endegsib maroqneb, “Anjam di gulube koba. Tamo yai a anjam di poiyqa kere?” 61 Degsib maroqnsib Yesus qa yomueqnabqa aqa are miligiq di qalieosiqa minjrej, “Ijo anjam dena nuŋgo areqalo ugetetŋgwo e? 62 Qure e Tamo Aŋgro nami soqnem qaji deq olo oqitqa niŋgi e nubsibqa kiersib are qalqab? 63 Qotei aqa Mondor a segi na tamo uŋgasari naŋgi ŋambile enjreqnu. Nuŋgo segi jejamu na niŋgi aqaryaiŋwa keresai. Ijo anjam kalil e na merŋgeqnum qaji di Mondor aqa anjam. Anjam dena niŋgi ŋambile oqab. 64 Ariya niŋgi qudei e qa nuŋgo areqalo siŋgilatosaieqnub.” Yesus a naŋgi degsi minjrej. Di kiyaqa? Aqa aŋgro yai naŋgi a qa naŋgo areqalo siŋgilatqasai di a nami qalieej. Tamo yai na Yesus ojsim jeu tamo naŋgo baŋq di atqas qaji di dego a nami qalieej. 65 Osiqa minjrej, “Tamo naŋgi di e qa naŋgo areqalo siŋgilatosaieqnub. Utru deqa e niŋgi merŋgonum, ‘Qotei na tamo bei siŋgila yqasai di a ijoq bqa keresai.’”

66 Yesus a anjam degsi marnaqa aqa aŋgro gargekoba naŋgi a dauryqa uratosib jaraieb. 67 Onaqa Yesus a na aqa aŋgro 12-pela naŋgi minjrej, “Niŋgi dego e uratbosib jaraiqab e?”

68 Onaqa Saimon Pita na minjej, “O Tamo Koba, iga ni uratmosim tamo yai aqaq gilqom? Ni segi qujai ŋambile gaigai sqajqa anjam mergeqnum. 69 Iga ni qa gago areqalo siŋgilatosim endegsi qalieonum, Qotei aqa segi Tamo Bole a na nami giltej qaji agi ni qujai.”

70 Onaqa Yesus na minjrej, “E segi na ijo aŋgro 12-pela niŋgi giltŋgem. Ariya nuŋgo ambleq di ijo aŋgro bei a mondor uge ti unu.” 71 Yesus a Saimon Iskariot aqa ŋiri Judas qa degsi marej. Yesus aqa aŋgro 12-pela naŋgi deqaji bei agi Judas. A na bunuqna Yesus ojsim jeu tamo naŋgo baŋq di atqas qaji.